Historia

Ina egliada els protocols dil Cerchel Cultural Laax

09-02-1985
Il scrinari ha tarmess in plan per ina scaffa dubla en tieu cun portas en veider.

02-09-1985
Ei vegn giavischau d'endrizzar ed arver la biblioteca en la Sentupada sin igl atun/unviern 1985.

26-08-1986
Ils cudischs ein cumprai e deponi sin las crunas. Ussa seigi d'elaborar in sistem per ch'igl interessent sappi far diever da quels cudischs cun caschun.

23-12-1986
Las lavurs da registraziun, ordinaziun e metter si cuviartas van plaunet a fin. Previu ei dad arver la preit (scaffa) da cudischs el decuors dils meins schaner/fevrer 1987 (all'entschatta 2 gadas il meins, suenter tenor interess davart ils lecturs).

13-02-1987
Muort la "Preit da cudischs" ch'ei vegnida aviarta ils 11 da fevrer 1987 ei la suprastonza seradunada quellagada giu ella Sentupada. Havend declarau cuortamein quella nova purschida engrazia il parsura per igl engaschament en quella caussa.

10-03-1988
Sin la gliesta d'inventari dalla "Preit da cudischs" secattan da quei da 400 tetels.

17-10-1988
Igl interess per la "Preit da cudischs" ei quasi 0.

06-02-1989
Sin la gliesta d'inventari dalla "Preit da cudischs" anflan ins medemamein ils cudischs ord gl'archiv dalla Uniun da giuventetgna ed ils cudischs ord il "relasch Burkhard" che sesanflan el museum.

11-02-1990
Duront igl onn vargau ha il Cerchel Cultural puspei cumprau numerus cudischs.
Ord munconza da spazzi ein ina gronda part da quels deponi el tschaler dil Center communal.

12-04-1990
En connex cun la cumpra dalla Casa de Mont entras la Fundaziun Pro Laax vegn fatga la proposta d'endrizzar en quella ina biblioteca. Da menziunar ei en quest connex era che la biblioteca dalla Fundaziun Retoromana vegn disloccada el proxim temps dalla Cristallina el nuegl dil museum local. L'erecziun d'ina biblioteca en Casa de Mont purschess evtl. era la pusseivladad d'integrar questa gronda collecziun - che cuntegn surtut cudischs romontschs, scientifics ed ina gronda rimnada da cudischs conc. minoritads - en las novas localitads.
Ella discussiun che suonda vegn era menziunau il giavisch ch'ina evtl. biblioteca duess haver cunfins surveseivels. Q.v.d. ch'ins stuess gia da bial'entschatta fixar exactamain tgei che duess vegnir rimnau e tgei scopos che la biblioteca ha (biblioteca da studis, bibl. populara/publica, bibl. da scola).

29-01-1991
La suprastonza dil Cerchel Cultural sentaupa el spazius zuler d'entrada dalla Casa de Mont, acquistada igl onn vargau dalla Fundaziun Pro Laax. La suprastonza vul prender envesta da quella casa, anteriuramein inagada ina casa signerila. Ussa denton mereta ella struschamein quei adjectiv. Cunquei che la forza electrica ei gia vegnida interrutta per part ella Casa de Mont e cunquei che mo il president haveva ina cazzoletta da maun che funcziunava per propi ha l'envesta buca saviu cuzzar ditg. Tuttina ha ella dau ina impressiun rudimentara dalla casa - che duei gie survegnir inagada era in intent cultural.
Nossa brev dils 12 da december 1990 per mauns dalla suprastonza dalla Fundaziun Pro Laax ei curdaus sin terren fritgeivel. Nossas ideas han era anflau l'accoglientscha dil cussegl da fundaziun. Era pertuccont las duas rimnadas da cudischs, quella da prof.Maissen e quella dalla Fundaziun Retoromana, ha il cussegl priu ina decisiun da principi positiva. Ussa ha ei num elaborar ils concepts corrispundents e mirar ch'enzatgi baghegi si quella biblioteca.

09-12-1992
Il cavazzin "biblioteca" che ha accumpignau nus duront quei onn da lavur, sa pil mument vegnir mess ad acta. La selecziun dils cudischs ord la voluminusa biblioteca da prof.Maissen d.p.m. ei finida, ils cudischs inventarisai e deponi en ina stanza dalla casa parvenda. Leu spetgan els in meglier avegnir ella Casa de Mont.

27-03-1996
La Pro Laax ha decidiu da realisar ella Casa de Mont ina biblioteca. Il Cerchel Cultural duess surprender il menaschi. InteressentAs che fan il cuors per bibliotecarAs ein encuretgs.

05-09-1996
10 persunas ein s'intressadas per gidar a metter en pei nossa biblioteca. Cun quellas persunas mein nus a mirar differentas bibliotecas e quellas vegnan era a far ils cuors fundamentals da biblioteca.

… e tgei scrivan las gasettas?

23-05-1997
ARENA ALVA
In Laax hat es eine Bibliothek

24-05-1997
BÜNDNER ZEITUNG
Tag der offenen Tür in der Casa de Mont in Laax

26-05-1997
LA QUOTIDIANA
Laax: Casa de Mont ei stada el center d'interess local

30-05-1997
ARENA ALVA
Eröffnung der "Casa de Mont"

05-06-1997
LA QUOTIDIANA
Rest Giacun Winzap ha presentau a Laax siu cudisch da prosa

19-09-1997
ARENA ALVA
Seit drei Monaten Bibliothek in Laax

05-05-1998
LA QUOTIDIANA
Laax: Cerchel cultural ha giu 20avla, biblioteca emprema radunonza

08-05-1998
ARENA ALVA
Zwanzigste und erste Generalversammlung

30-09-1998
LA QUOTIDIANA
La Biblioteca Laax ei zun activa

27-11-1998
ARENA ALVA
Fabulus, legendar, mistic e misterius

16-12-1998
LA QUOTIDIANA
Ina pintga giraffa fascinescha varga melli affons e carschi